|
Q'tes malheureux, Grous Jean, d'enn croire à rien !
Ch'est t'ravaler ou niveu ed tin quien
Eq d'enn pau vir qu'el bon Dghu moine el monne
Et qu'ech n'est pouant l'hazard qui nous toutonne.
Tu n'as donc pau, dis, jamoua réfléchi
Q'meint qu'in arrive et quitte ech monne chi,
Ioù qu'in s'in va pourrir dins l'chimintchère
Couchi sus l'dous, ess bouque pleine ed terre ?
V'là quand nou âme alle a quitchi nou corps
V'là coume ouss'rons tertous quand nous s'rons morts.
Tu n'compreinds pouant, dis-tu, et n'pux pas croire
Q'einn' fos hors d'nous nou âme all' viche oucroire :
Sans Dghu, pourquo avoir peur ed la mort ?
Quand in fouat mal pourquo avoir du r'mord?
Ed viv' sins corps cha t'parot tout risible :
Ch' n'est pau s'peindant, s'lon mi, pus z'impossibe
Ch' miraque i nest pau pas grand sins qu'avu.
D'lombe ed bon seins feut être dépourvu
Pou'n'pau vir cha et pour enn pau l'compreine.
Gn'a pau pus sourd qu'etchid qui n'vut inteine.
T'es-tu d'maindé ioù qu'el monne i fini,
As-tu peinsé quidfos à l'infini,
A chés laimpions accrouchis à ch'grand dôme,
Qu'esch pus z'ignare est fourchi d'admirer.
Qui font si bien vir el néant ed l'homme ?
A telle heuteur ous'ros-tu t'mesurer,
Géant d'cinq pieds, chétive créature ,
Qu'atteind la mort, chés vers et l'pourriture ?
Et si d'tout cha t'as ouccupé t'n' esprit,
M'diros-tu bien si tu yas rien compris ?
Tout cha existe et suit tranquill'meint s'route ;
Qui-est ch' qui l'l'o fouat ? Ech n'est pau ti sins doute.
Ch' n'est pau aisé d'inveinter ess souleil.
Ch'moudèle i luit : fas z'ein peu ein pareil !
Ou bien oucoire épréve à faire einn' leine,
Einn'tchote étoile, ou seul' meint einn' caleine,
Et j'm' expliq'rai, ech compreindrai l'raison
Q'tas d'enn pau dire à Dghu l'moinde ouraison.
Tu n'cros à rien, ourgueilleux,philoudophe,
Et t'in r'habile' in méprisansiant ch'l'étoffe.
S'il est permis d'fouaire el comparaison,
Tu n'tranes pouant peindant deux jours el fiève,
Q'lache et couyon, et si péreux qu'ein iève,
Tu d'mane' à Dghu,, à deux g'noux,t'guérison!
CRINON Hector - Satires picardes
et autres oeuvres .
|
Précédent
Retour