|
J'vous ai fouat vir l'eutt' jour qu'el socialisme
I consistot, quand in n'avot pus rien,
A r'peine à cheux qui conserveint leu bien:
J'vas vous montrer joud'hui q'sous l'communisme
Gn'éra q'chés forts, chés guelus qui maq'ront;
Ech peuve honteux pass'ra souveint d'sous l'tave ;
Ech tchoutin n'mainge eq quand q'leute il est rond.
Put-t-on jamoua croire chés balivernes,
croire qu'in put, tout comme ein tas d'pourcheux,
Sans s'étraner, jouqui dins des casernes,
Boire à l'même baque et vive in émoncheux ?
Gn' a tout partout ein tas d'vilains goulafes
qui boit' t et mainj't in bavant coumm' des gnafes ;
Chés goulus-là, quand i n'feut pau payi
Il'aval'reint l'erv'nu d'eine abayi ;
Il' aim'reint mieux crever qu'ed quitchi l'tave,
S'i gn'in restot l'motchi d'einn botte ed rave .
Cheux qu'il'ont peur ed preinn' pusse eq leux parts,
N's'reint pau seuvés avu d'pareils maquarts,
I'n crév'reint pouant l'cheinture ed leux culottes,
El pus souveoint i n' récoureint q'chés miottes,
Et, seuf respect, i n'quéreint pau d'grosses crottes.
Gn'éra ein moîte, ein maricha'd'lougi'
Pour tayi l'soupe épi el'partagi.
Malgré qu'i f'ra, c'hti-là, s'part toujours bonne,
Je'l' ploins s'i feut qu'i conteinte sin monne :
L'ein voura gras, l'eute i d'maindra du maigue,
Chti-chi du doux, chti-là n'voura q'du aigue ;
Mais si la gueule all' li veut du tourmeint,
I conteint'ro bien pus diffiii'meint
Chés bounets blancs qui n'séreints r't'nir leux lanques
Et ni finir el' premierr' leux harangues.
D'puis qu'Eve a'té teintée edsous l'pommier,
Femmes qui piss't edsus l'même félier
N'ont jamoua seu ess pardouner einn' feute,
Rester in paix deux minutes, dit-on.
F'ront elle'ilo meintir ech viux dicton ?
S'arrainj'ront-elle' ein s'moine avec l'einn 'l'eute ?
CRINON Hector - Satires picardes
et autres oeuvres .
|
Précédent
Retour