| In n'éra pus b'zoin d'servir pour maingi;
Tout ch'bien, qu'in dit, va ête partagi,
Cha voura coire émieux q'chés républiques ;
In n'éra pus d'moite' et ni d'doumestiques;
Outant l'ein q'l'eute in s'ra cht'heure tertous;
Chés grous ceinsiers i n's'ront pau puss eq nous ;
Tout i pioch'ra, dit-on.-Pour eq j'el croiche,
J'vous avoûrai, m'z'amis, qu'il feut q'j'el voiche.
Q'meint partagi tous chés quiamps, chés catcheux,
Chés bleux bonnets, chés coutrons, chés mantcheux?
In s'inteindrot pour partagi tout l'terre,
Quant in n's'inteind pou'l'succession d'sin père !
Chaquein vourot toujours avoir raison,
quasir pour li et pus belle mason.
Q'meint conteinter tant d'geins et pis d'tant d'sorte',
qui vont truver leu part toujours troup tchote,
Qui vouront d'z'ieux quant il éront des bous,
Pis des soulés, si l'lieux vient des chabouts ?
J'gaj'ros, m'z'amis, min eu conte ein visage,
Q'huit jours après foure r'q'meinchi ch'partage ;
L'ein diunn'ro s'part pour ein verre et drain d'vin,
Ein eute à carte'i perdro sin frusquin,
Taindis qu'ed z'eute'i dounn'reint à chés fèmes
Les fous qu'i sont , jusqu'à leur dernierr'plèmes.
Pis chés truands, qui manq'ront souveint d'pain,
Les laiss'ra-t-on, cheux là, moirir ed faim ?
Pusse eq nous s'rons oussi riches l'einn' l'eute,
Foura q'chaquein i cultive sin cuin,
Meuche sin blé, s'in li prête ein moulin.
Chés coutriersn'front q'pour eux des casaques,
N'boiront du lait q'cheux qu'il'éront des vaques,
Et si gn'in manque ed vaque', ess z'amateux
S'arrainj'reint-i s'i n'n'aveint qu'eine à deux ?
Ech pus malin i boiro tout l'traiture
Pour éviter à l'eute ed maingi ch'burre.
Vous convarez q'cha f'ra bien gabgi,
Si, coume in dit, in va tout partagi.
CRINON Hector - Satires picardes
et autres oeuvres .
|
Retour