|
Tout l'monne i s' ploint, ch'moite et pisch' doumestique;
Ech l'ouvrier, qu'in est pour li troup strique
Et pis qu'in l'fouat travailli sins raison ;
Ch'moite, qu'in n'a d'intérêt pou' s'mason.
Edpuis q'chaquein a sin biud Dghu dins s'poche,
Mes tchous amis , clà coume i feut q'cha voche ;
Pour erligion pus d'el moutchi d'chés geins
N'ont q'l'intérêt, pour bon Dghu q'l'argeint.
Ed l'Evangile in n'vot pus fouaire usage,
Coume Jésus in n'teind pas l'eutt' visage,
Pour einn' mourniffe in reind quid queuxd'chabouts :
Vlà l'charité qui s'pratique interr nous.
Quand in n'érot sus l'dous qu'einn' méchantt' loque,
Ains patalon eq tout ch'bas s'déferloque,
Dins sin misère in tache ed s'erquinqui ;
N's'rot t-i q'par s'barbe, i feut s'fouaire ermerqui ;
Outant q'nous sons, l'ourgeuil qui nous talonne
Nous crèv'rot l'pieu, s'a n'étot pau si bonne.
Où qu'il est l'temps qu'ech moite avu ch'pourqui
I s'attuyeint sins croire in rien s'manqui ?
Tirant d'lés deux l'soupe à l'même gamelle,
Et courtisaint quitfos el mum' fémelle,
Si l'conteintt'meint les reindot tout rêtus,
Ech n'étot pouant toujours d'êtte' bien quertus.
Pour leux habits i n'foulot pau d'oumoile ;
Mais s'i n'aveint rien qu'einn' maronne ed toile,
Il aveint l'don, avu l'moutchi d'tros sous,
D'ess divertir sins souci coumm' des fous ;
I S'amuseint, sins fuyi dins leux poches,
Enn s'rott t-i'té qu'à s'douner des taloches,
Ou bien quitfos à l'pierrette à muchi ;
Ch'étot plaisi rt joie à bon marchi ;
Feut figurer, cht'heure, et l'peu qu'in dépoule,
N'récoultr'ot t-on eq pour nourrir einn' poule,
Feut l'monte à ch'fieu, à chell'fille ech capieu,
Il a bien dir' qu'i fourot qu'i s'erqueuche,
Qu'i n'a pas l'sou : rien ! S'i n'n'a pas, qu'i n'n'euche !
Quand i devrot aller tout fin mernu,
I feut qu'ess fille all' danse el long d'el nu.
Ch'père, à sin tour, si par hazard i sorte.
Ché n's'ra, bien seur, qu'avu quidzeind'ess sorte ;
Il a pus quair s'innuyi d't-in-part-li
Qu'ed s'amuser avu pus peuve eq li.
Gn'a pau d'dangi qu'el fill' qui seint l'breind'vaque,
Vourot d'ein fieu qui n'érot qu'ess baraque.
Ed fond in combe el monne il est cangi ;
Ch' moite et ch'valet n'séreint pus s'arraingi ;
In n'sérot pus rien indurer d'l'einn'l'eute,
I n' pri' l'bon Dghu q'parce qu'i n' put l'q'mander.
Ouyu d'servir pour n'pau êtt' gourmandés
Il' ont,d'd'ouqueins, pus quair aller d'mander.
Parche qu'in s'z'a quitfos m'nachis d'el porte.
Ch'moite, à sin tour, i n'indure d'eutt' sorte :
N'el m'nach' t-on pouant, li ed laissier in plan
Tout s'n'attirail et pis tout s'boitacaln ?
Gn'a des ceinsiers qui n'sém't eq tourmeintaine
Et qui s'étonne't ed récoulter d'el haine ,
A leurs valets qui copent leurs mourcheux
In les fasant travailli tant q'des g'veux,
Qui les harchèl't, à feute outant qu'à drèche ;
Gn'a si tchout ver qu'à la fin i n's'erdrèche,
et tâche es morde etchid qui plet sur li ;
Personne i n'put pau vive ed t'in-part-li.
Avu nous geins n'furchons donc pau si aigue',
In n'attrapp' pau d'mouque ' avu du vinaigue.
Quand ein vieux g'veu enn sérot pus marchi,
Cha fouat du ma d'el veinn' pour écourchi
Pus malhéreux souveint q'chés peuv' z'aroutes,
D'rot t-on souffrir, pour s'in débarrachi,
Quand i sont vieux, usés, tout erfronchi',
Q'nos peuv'valets voivheint d'mander leux croutes !
Ch'nest pau q'chés peuv'il'ont leu vive oussi :
Feut qu'einn' bonn' bête alle euch' toujours ein si.
Il' ont quitfos d'hieux grous défeuts par plache ;
L'ourgeuil, qu'in dit, tcheint compagnie à l'b'zache,
I n' n'ereint moins si nous n' n'aveins pau tant,
Car ch'est sur nous qu'i règuent in tout temps.
I n'feut pas q'cha nous fach' fouaire el grimache,
Nous n'ons pas l'drot d'les trouver si mourveux
Quand nous avons el nez oussi sal' qu'eux.
Qu'in n' preinch' paucha pour ein tchout queue et patte :
Nous sons tertous du pain fouat d'el mêmm' pâte ;
Malgré ch'bieu drap, chés terre' et pis ch'l'argeint,
Seuf el mérite, i gn'a qu'einn' sorte ed geins.
Combien d'pourquis ont brav'meint pourté chape !
Six-Quint, qu'étot, dit-on, bel et bon pape
Tout deloq'té, sins chabouts ni queuchons,
Etant galmite, i wardot chés couchons.
Tout étant pape, il ergrétot pe't-ête,
Din sin palais, s'cachoire et pis s'bourlette,
Sin joune temps, passé à pieds déqueux ;
Quand i gn'érot pau yeu toujours troup queud,
Rien n'l'attristot, et souveint d'einn' journée
I riot pusse eq pape el long d'l'ennée.
Ch'n'est pau l'richesse, allez, et ni l'grandeur :
Qu'in d'sir tertous, qui nous donn't el bonheur :
Chés cairs conteints, parmi chés wardeux d'vaques,
Sont pus coumeins qu'edzous chés bell' casaques.
CRINON Hector - Satires picardes
et autres oeuvres .
|
Précédent
Retour